אֶל-הָעִבְרִים

א    1 הָאֱלֹהִים אֲשֶׁר-דִּבֶּר מִקֶּדֶם אֶל-אֲבוֹתֵינוּ פְּעָמִים רַבּוֹת וּבְפָנִים שֹׁנִים עַל-יְדֵי הַנְּבִיאִים׃ 2 דִּבֶּר אֵלֵינוּ לְקֵץ הַיָּמִין הָאֵלֶּה עַל-פִּי הַבֵּן אֲשֶׁר שָׂמָהוּ לְבַעַל נַחֲלָה בַכֹּל וַאֲשֶׁר בּוֹ עָשָׂה גַּם-שָׁמַיִם וָאָרֶץ׃ 3 וְהוּא זֹהַר כְּבוֹדוֹ וְצֶלֶם פָּנָיו וְנֹשֵׂא-כֹל בְּכֹחַ דְּבָרוֹ וְאַחֲרֵי אֲשֶׁר טִהֵר אֹתָנוּ בְּנַפְשׁוֹ מֵחַטֹּאתֵינוּ יָשַׁב מִימִין אֲשֶׁר לוֹ הַגְּדֻלָּה בַּמָּרוֹם׃ 4 וַיִּגְבַּהּ לְמַעְלָה מִן-הַמַּלְאָכִים כַּאֲשֶׁר קָנָה לוֹ שֵׁם רָם וְנִשָּׂא מֵהֶם׃ 5 כִּי לְמִי מִן-הַמַּלְאָכִים אָמַר מֵעוֹלָם בְּנִי אָתָּה אֲנִי הַיּוֹם יְלִדְתִּיךָ וְכֵן עוֹד אֲנִי אֶהְיֶה-לּוֹ לְאָב וְהוּא יִהְיֶה-לִּי לְבֵן׃ 6 וְכֵן בְּתִתּוֹ אֶת-בְּכוֹרוֹ לָשׁוּב לְתֵבֵל אַרְצָה הוּא אֹמֵר הִשְׁתַּחֲווּ לוֹ כָּל-מַלְאֲכֵי אֱלֹהִים׃ 7 וְעַל-הַמַלְאָכִים הוּא אֹמֵר עֹשֶׂה מַלְאָכָיו רוּחוֹת מְשָׁרְתָיו אֵשׁ לֹהֵט׃ 8 אַךְ עַל-הַבֵּן אֹמֵר כִּסְאֲךָ אֱלֹהִים עוֹלָם וָעֶד שֵׁבֶט מִישֹׁר שֵׁבֶט מַלְכוּתֶךָ׃ 9 אָהַבְתָּ צֶּדֶק וַתִּשְׂנָא רֶשַׁע עַל-כֵּן מְשָׁחֲךָ אֱלֹהִים אֱלֹהֶיךָ שֶׁמֶן שָׂשׂוֹן מֵחֲבֵרֶךָ׃ 10 וְכֵן עוֹד אַתָּה אֲדֹנָי לְפָנִים הָאָרֶץ יָסַדְתָּ וּמַעֲשֵׂי יָדֶיךָ שָׁמָיִם׃ 11 הֵמָּה יֹאבֵדוּ וְאַתָּה תַעֲמֹד וְכֻלָּם כַּבֶּגֶד יִבְלוּ׃ 12 כַּלְּבוּשׁ תַּחֲלִיפֵם וְיַחְלֹפוּ וְאַתָּה הוּא וּשְׁנוֹתֶיךָ לֹא יִתָּמּוּ׃ 13 וּלְמִי אֵיפוֹא מִן-הַמַּלְאָכִים אָמַר מֵעוֹלָם שֵׁב לִימִינִי עַד-אָשִׁית אֹיְבֶיךָ הֲדֹם לְרַגְלֶיךָ׃ 14 הֲלֹא כֻלָּם מַלְאֲכֵי הַשָּׁרֵת הֵם הַשְּׁלוּחִים לְשָׁרֵת לִפְנֵי הַבָּאִים לִנְחֹל יֵשַׁע נַחֲלָתָם׃

ב    1 עַל-כֵּן הַמִּצְוָה אֵלֵינוּ לְהִזָּהֵר עַד-מְאֹד בַּדְּבָרִים אֲשֶׁר שָׁמָעְנוּ פֶּן-יָלוּזוּ מֵעֵינֵינוּ׃ 2 כִּי אִם-הַדָּבָר דָּבֻר עַל-פִּי מַלְאָכִים עָמַד בְּתָקְפוֹ וְכָל-עָוֹן וָפֶשַׁע נִפְקַד בְּשֵׁבֶט מִשְׁפָּט׃ 3 אֵיךְ נִמָּלֵט אֲנַחְנוּ אִם-לֹא נָשִׁית לֵב לְיֶשַׁע רַב כָּמוֹהוּ אֲשֶׁר בִּשַּׂר הָאָדוֹן מֵרֹאשׁ וַיֵּאָמֵן דְּבָרוֹ לָנוּ מִפִּי שֹׁמְעָיו׃ 4 וְגַם-אֱלֹהִים נָתַן עֵדוּת עַל-זֹאת בְּאֹתוֹת וּבְמוֹפְתִים וְנִפְלָאוֹת וּבְמַתְּנוֹת רוּחַ קָדְשׁוֹ אֲשֶׁר חִלֵּק כִּרְצוֹנוֹ׃ 5 כִּי לֹא תַחַת יְדֵי-הַמַלְאָכִים שָׁת אֶת-הָעוֹלָם הֶעָתִיד לָבֹא אֲשֶׁר עָלָיו אֲנַחְנוּ מְדַבְּרִים׃ 6 כִּי אִם-כְּעֵדוּת הַכָּתוּב הָאֹמֵר שָׁם מָה-אֱנוֹשׁ כִּי-תִּזְכְּרֶנּוּ וּבֶן-אָדָם כִּי תִפְקְדֶנּוּ׃ 7 וַתְּחַסְּרֵהוּ מְעַט מֵאֱלֹהִים וְכָבוֹד וְהָדָר תְּעַטְּרֵהוּ תַּמְשִׁילֵהוּ בְּמַעֲשֵׂי יָדֶיךָ׃ 8 כֹּל שַׁתָּה תַחַת-רַגְלָיו אַךְ בַּאֲשֶׁר שָׁת כֹּל תַּחְתָּיו לֹא הוֹתִיר דָּבָר אֲשֶׁר לֹא הוּשַׁת תַּחְתָּיו וְעַתָּה לֹא רָאִינוּ עוֹד כַיּוֹם כִּי הַכֹּל הוּשַׁת תַּחְתָּיו׃ 9 אֲבָל רֹאִים אֲנַחְנוּ אֶת-יֵשׁוּעַ הַהוּא אֲשֶׁר חִסְּרוֹ מְעַט מֵאֱלֹהִים וַיְעַטְּרֵהוּ כָבוֹד וְהָדָר עֵקֶב חֶבְלֵי הַמָוֶת אֲשֶׁר אֲפָפוּהוּ כִּי בְחֶסֶד-אֵל טָעַם טַעַם הַמָּוֶת בְּעַד כֻּלָּם׃ 10 כִּי הוּא אֲשֶׁר הַכֹּל לְמַעֲנֵהוּ וּמִיָּדוֹ הַכֹּל הָדָר הוּא לוֹ לְהַנְחוֹת בָּנִים רַבִּים לִגְאוֹן עֻזָּם וּלְהַשְׁלִים אֶת-שַׂר יְשׁוּעָתָם בְּכוּר עֹנִי׃ 11 כִּי הַמְכַפֵּר וְהֵם אֲשֶׁר עֲלֵיהֶם יְכַפֵּר מֵאָב אֶחָד הֵם כֻּלָּם עַל-כֵּן לֹא בוֹשׁ מִקְּרֹא לָהֶם אַחִים׃ 12 בְּאָמְרוֹ אֲסַפְּרָה שִׁמְךָ לְאֶחָי בְּתוֹךְ קָהָל אֲהַלֲלֶךָ׃ 13 וְעוֹד יֵאָמַר וְקִוֵּיתִי לוֹ וְעוֹד יוֹסִיף הִנֵּה אָנֹכִי וְהַיְלָדִים אֲשֶׁר נָתַן-לִי יְהוָֹה׃ 14 וְיַעַן כִּי הַיְלָדִים בָּשָׂר וָדָם מְנָת חֶלְקָם כֵּן גַּם-הוּא לָבַשׁ בָּשָׂר וָדָם כְּמוֹהֶם לְמַעַן יְבַלַּע בְּמוֹתוֹ אֶת-מַלְאַךְ הַמָּוֶת הוּא הַשָּׂטָן׃ 15 וְשִׁלַּח לַחָפְשִׁי אֶת-אֵלֶּה אֲשֶׁר מֵאֵימַת מָוֶת הָיוּ נִכְבָּשִׁים כָּל-יְמֵי חַיֵּיהֶם כַּעֲבָדִים׃ 16 כִּי לֹא לַמַּלְאָכִים נָטָה יָדוֹ לְהוֹשִׁיעָם כִּי אִם-לְזֶרַע אַבְרָהָם הוּא לְמוֹשִׁיעַ׃ 17 וְעַל-כֵּן נִמְשַׁל נִדְמָה לְאֶחָיו בַּכֹּל לְמַעַן יְהִי כֹהֵן גָּדוֹל בְּרַחֲמָיו וּבֶאֱמוּנָתוֹ לִפְנֵי אֱלֹהִים לְכַפֵּר עַל-חַטֹּאת הָעָם׃ 18 כִּי כַאֲשֶׁר הָיָה אִישׁ מַכְאֹבוֹת וִידוּעַ מַסָּה בְּנַפְשׁוֹ כֵּן יוּכַל לְהוֹשִׁיעַ בְּחוּנֵי מַסָּה׃

ג    1 עַל-כֵּן אַחַי אַנְשֵׁי קֹדֶשׁ חֲבֵרִים מַקְשִׁיבִים לִקְרִיאַת מָרוֹם הַבִּיטוּ פְנֵי מַלְאָכוֹ הַכֹּהֵן הַגָּדוֹל אֲשֶׁר לוֹ תִשָּׁבַע לְשׁוֹנֵנוּ הוּא הַמָּשִׁיחַ יֵשׁוּעַ׃ 2 אֲשֶׁר נֶאֱמָן הוּא לְעֹשֵׂהוּ בְּכָל-בֵּיתוֹ כְּמשֶׁה׃ 3 כִּי-יָאֲתָה לּוֹ יֶתֶר שְׂאֵת עַל-משֶׁה כַּאֲשֶׁר בֹּנֵה בַיִת רַב כְּבוֹדוֹ מִן-הַבָּיִת׃ 4 כִּי כָל-בַּיִת בָּנוּי בִּידֵי בֹנֶה וּבֹנֵה-כֹל הוּא אֱלֹהִים׃ 5 אָמְנָם משֶׁה כְּעֶבֶד נֶאֱמָן הָיָה בְכָל-בֵּיתוֹ לְעֵדוּת עַל-אֲמָרָיו אֲשֶׁק יֵאָמֵרוּן׃ 6 אַךְ הַמָּשִׁיחַ נֶאֱמָן כְּבֵן בְּבֵיתוֹ וּבֵיתוֹ אֲנָחְנוּ אִם רַק נֹאחֵז בְּמִבְטַחֵנוּ וְעֹז תִּקְוָתוֹ עַד-הַקֵּץ׃ 7 עַל-כֵּן כְּמוֹ שֶׁנֶּאֱמַר עַל-פִּי רוּחַ הַקֹּדֶשׁ הַיּוֹם אִם-בְּקֹלוֹ תִשְׁמָעוּ׃ 8 אַל-תַּקְשׁוּ לְבַבְכֶם כִּמְרִיבָה כְּיוֹם מַסָּה בַּמִּדְבָּר׃ 9 אֲשֶׁר נִסּוּנִי אֲבוֹתֵיכֶם בְּחָנוּנִי גַּם-רָאוּ פָעֳלַי אַרְבָּעִים שָׁנָה׃ 10 לָכֵן אָקוּט בַּדּוֹר הַהוּא וָאֹמַר תָּמִיד תֹּעֵי לֵבָב הֵם וְהֵם לֹא-יָדְעוּ דְרָכָי׃ 11 אֲשֶׁר-נִשְׁבַּעְתִּי בְאַפִּי אִם-יְבֹאוּן אֶל-מְנוּחָתִי׃ 12 רְאוּ-נָא אַחַי גַּם-אַתֶּם פֶּן-יֵשׁ בָּכֶם לֵב רָע חֲסַר אֱמוּנָה לָסוּר מֵאַחֲרֵי אֱלֹהִים חַיִּים׃ 13 אַךְ הוֹכִיחוּ אִישׁ אֶת-רֵעֵהוּ יוֹם בְּיוֹם כָּל-עוֹד אֲשֶׁר יִקָּרֵא הַיּוֹם לְבִלְתִּי יִקֶשׁ לֵב אִישׁ מִכֶּם בְּנִכְלֵי חַטָּאתוֹ׃ 14 כִּי חֲבֵרִים אֲנַחְנוּ לַמָּשִׁיח אִם רַק נֹאחֵז בְּמִבְטַחֵנוּ מֵהָחֵל וְעַד-כַּלֵּה׃ 15 וְכַאֲשֶׁר נֶאֱמַר הַיּוֹם אִם-בְּקֹלוֹ תִשְׁמָעוּ אַל-תַּקְשׁוּ לְבַבְכֶם כִּמְרִיבָה׃ 16 וּמִי הָיוּ הַשֹּׁמְעִים בַּעֲלֵי הַמְּרִיבָה הֲלֹא כָל-הַיֹּצְאִים מִמִּצְרַיִם בְּיַד-משֶׁה׃ 17 וּבְמִי הִתְקוֹטֵט אַרְבָּעִים שָׁנָה הֲלֹא בַחַטָּאִים אֲשֶׁר פִּגְרֵיהֶם נָפְלוּ בַמִּדְבָּר׃ 18 וְעַל-מִי נִשְׁבַּע אִם-יְבֹאוּן אֶל-מְנוּחָתוֹ הֲלֹא עַל-אֵלֶּה אֲשֶׁר לֹא הֶאֱמִינוּ׃ 19 וַאֲנַחְנוּ רֹאִים כִּי לֹא יָכְלוּ לָבֹא מִפְּנֵי חֹסֶר אֱמוּנָתָם׃

ד    1 עַל-כֵּן בְּהִוָּתֵר לָנוּ הַהַבְטָחָה לָבֹא אֶל-מְנוּחָתוֹ נִדְאַג לְנַפְשֵׁנוּ פֶּן-יֵחָשֵׁב אִישׁ מִכֶּם כִּמְאַחֵר לָבֹא שָׁמָּה׃ 2 כִּי בְשׂרָה טוֹבָה בָּאָה גַּם-אֵלֵינוּ גַּם-אֲלֵיהֶם אַךְ הַדָּבָר אֲשֶׁר שָׁמְעוּ הֵם לֹא-הוֹעִיל לָהֶם כִּי לֹא הִתְעָרַב בֶּאֱמוּנַת לִבָּם׃ 3 כִּי אֲנַחְנוּ הַמַּאֲמִינִים בָּאִים אֶל-מְנוּחָתוֹ כַּאֲשֶׁר אָמָר אֲשֶׁר-נִשְׁבַּעְתִּי בְאַפִּי אִם-יְבֹאוּן אֶל-מְנוּחָתִי וּמְנוּחָה זוּ הִיא מִן-הַמְּלָאכָה אֲשֶׁר נֶעֶשְׂתָה בְּהִוָּסֵד אֶרֶץ וְשָׁמָיִם׃ 4 כִּי עַל-יוֹם הַשְּׁבִיעִי אֹמֵר בְּמָקוֹם אַחֵר וַיִּשְׁבֹּת אֱלֹהִים בַּיּוֹם הַשְּׁבִיעִי מִכָּל-מְלַאכְתּוֹ׃ 5 וּבַמָּקוֹם הַזֶּה יֹאמַר עוֹד אִם-יְבֹאוּן אֶל-מְנוּחָתִי׃ 6 הַיֹּצֵא לָנוּ מִכָּל-זֶה כִּי יֵשׁ בָּאִים אֶל-הַמְּנוּחָה וְהַשֹּׁמְעִים אֶת-בְּשׂרָה טוֹבָה מֵרֹאשׁ לֹא-בָאוּ מִפְּנֵי חֹסֶר אֱמוּנָתָם׃ 7 וּלְקֵץ יָמִים רַבִּים הוֹסִיף וְיָעַד יוֹם אַחֵר בְּאָמְרוֹ עַל-פִּי דָוִד הַיּוֹם כְּמוֹ שֶׁנֶּאֱמַר הַיּוֹם אִם-בְּקֹלוֹ תִשְׁמָעוּ אַל-תַּקְשׁוּ לְבַבְכֶם׃ 8 כִּי אִלּוּ הֵבִיאָם יְהוֹשֻׁעַ אֶל-הַמְּנוּחָה הַנְּכוֹנָה לֹא הָיָה מְדַבֵּר אַחֲרֵי-כֵן עַל-יוֹם אַחֵר׃ 9 וְלָכֵן עוֹד נִשְׁאַר יוֹם שַׁבָּתוֹן לְעַם אֱלֹהִים׃ 10 כִּי הַבָּא אֶל-מְנוּחָתוֹ יִשְׁבֹּת מִמְּלַאכְתּוֹ כַּאֲשֶׁר גַּם-שָׁבַת אֱלֹהִים מִמְּלַאכְתּוֹ שֶׁלּוֹ׃ 11 לָכֵן נִתְאַמְּצָה לָבֹא אֶל-הַמְּנוּחָה הַהִיא פֶּן-יִכָּשֶׁל אִישׁ בְּלֶכְתּוֹ בְּעִקְּבוֹת הַמַמְרִים׃ 12 כִּי-חַי דְּבַר אֱלֹהִים חָזָק וְחַד מִכָּל-חֶרֶב פִּיפִיּוֹת חֹצֵב וּבֹקֵעַ נֶפֶשׁ וָרוּחַ גַּם-מֹחַ וַעֲצָמוֹת וּבֹחֵן מַחְשְׁבוֹת לֵב וְיִצְרוֹ׃ 13 וְאֵין יְצוּר נֶעְלָם מִלְּפָנָיו אַךְ הַכֹּל חָשׂוּף וְגָלוּי לְעֵינֵי הַהוּא אֲשֶׁר עָלֵינוּ לָתֵת דִּין לְפָנָיו׃ 14 וְעַתָּה בִּהְיוֹת-לָנוּ כֹהֵן גָּדוֹל נַעֲלֶה עַד-מְאֹד אֲשֶׁר צָלַח אֶת-הַשָּׁמַיִם יֵשׁוּעַ בֶּן-אֱלֹהִים נִשְׁמְרָה אֶת-הַשְּׁבוּעָה אֲשֶׁר נִשְׁבַּעְנוּ לוֹ׃ 15 כִּי אֵין לָנוּ כֹהֵן גָּדוֹל אֲשֶׁר לֹא-יוּכַל לָחוּשׁ לְשִׁבְרֵנוּ אַחֲרֵי אֲשֶׁר גַּם-הוּא נִבְחַן בְּמַסּוֹת כָּמֹנוּ וְחֵטְא לֹא נִמְצָא-בוֹ׃ 16 עַל-כֵּן נִגְּשָׁה בְּפֶה מָלֵא אֶל-כִּסֵּא הָרַחֲמִים לָקַחַת חֶסֶד וְלִמְצֹא חֲנִינָה לַעֲזָר-לָנוּ לְעִתּוֹת בַּצָּרָה׃

ה    1 כִּי כָל-כֹּהֵן גָּדוֹל הַמּוּרָם מִבְּנֵי אָדָם נוֹעַד לַעֲמֹד לִפְנֵי אֱלֹהִים בְּעַד בְּנֵי אָדָם לְהַקְרִיב מִנְחָה וָזֶבַח עַל-חַטֹּאתָם׃ 2 וְהוּא מוּכָן לְהַרְגִּיעַ רִגְשַׁת נַפְשׁוֹ לְשֹׁגְגִים וּלְתֹעִים כִּי גַם-הוּא אֵין מְתֹם בִּבְשָׂרוֹ מִכַּף-רֶגֶל וְעַד-רֹאשׁ׃ 3 בַּעֲבוּר זֹאת הָיָה עלָיו לְהַקְרִיב בְּעַד חַטַּאת נַפְשׁוֹ כְּמוֹ בְעַד הָעָם׃ 4 וְלֹא יִקַּח אִישׁ אֶת-הַכָּבוֹד הַזֶּה לְנַפְשׁוֹ כִּי אִם-אֶת-אֲשֶׁר יִבְחַר-בּוֹ הָאֱלֹהִים כְּאַהֲרֹן׃ 5 כֵּן גַּם-הַמָּשִׁיחַ לֹא הִתְנַשֵּׂא מִנַּפְשׁוֹ לִהְיוֹת כֹּהֵן גָּדוֹל כִּי אִם-עַל-פִּי הָאֹמֵר אֵלָיו בְּנִי אַתָּה אֲנִי הַיּוֹם יְלִדְתִּיךָ׃ 6 וְכַאֲשֶׁר אָמַר גַּם-בְּמָקוֹם אַחֵר אַתָּה-כֹהֵן לְעוֹלָם עַל-דִּבְרָתִי מַלְכִּי-צֶדֶק׃ 7 אֲשֶׁר בִּימֵי מְגּוּרָיו בִּבְשָׂרוֹ הִקְרִיב תְּפִלּוֹת וְתַחֲנוּנִים בְּקוֹל שַׁוְעָתוֹ וְדִמְעָתוֹ לִפְנֵי שַׂגִּיא כֹחַ יְחַלְּצֶנּוּ מִמָּוֶת וַיֵּעָתֵר-לוֹ עֵקֶב יִרְאָתוֹ׃ 8 וְאַף בִּהְיוֹתוֹ בֵן לֻמַּד בְּסִבְלֹתָיו לִשְׁמֹעַ בְּקוֹל מְצַוֶּה׃ 9 וּבְהִמָּצְאוֹ שָׁלֵם הָיָה לְכָל-שֹׁמְעָיו לִמְקוֹר תְּשׁוּעַת עוֹלָמִים׃ 10 וּפִי אֱלֹהִים יִקֳּבֶנּוּ כֹּהֵן גָּדוֹל עַל-דִּבְרָתִי מַלְכִּי-צֶדֶק׃ 11 עַל-זֶה יֶשׁ-לָנוּ הַרְבֵּה לְדַבֵּר וְדֵי-בָאֵר כָּבֵד מִמֶּנּוּ בִּהְיוֹתְכֶם עַרְלֵי-אֹזֶן׃ 12 כִּי תַחַת אֲשֶׁר הָיָה עֲלֵיכֶם לִהְיוֹת מוֹרִים בְּרֹב הַיָּמִים נָחוּץ הַדָּבָר עַתָּה לָשׁוּב לְחַוֹּת דַּעַת לָכֶם מָה הֵמָּה אַבְנֵי פִנָּה בְּתוֹרַת אֱלֹהִים וּנְכֹנִים אַתֶּם לְחָלָב וְלֹא לְלֶחֶם שָׁמֵן׃ 13 כִּי כָל-מִי אֲשֶׁר חָלָב מְזוֹנוֹ אֵין לוֹ דֵעָה בְדִבְרֵי צֶדֶק כִּי עוֹלֵל הוּא׃ 14 וְלֶחֶם שָׁמֵן לִשְׁלֵמִים אֲשֶׁר הַסְכֵּן הִסְכִּינוּ בִּבְחִינַת לִבּוֹתָם לְהַבְדִּיל בֵּין-טוֹב לָרָע׃

ו    1 עַל-כֵּן נֶרֶף כָּעֵת מֵאַבְנֵי פִנָּה בְּתוֹרַת הַמָשִׁיחַ וְנַעֲלֶה עַד-תַכְלִיתָהּ וְלֹא נָשׁוּב לִירוֹת אֶת-הַיְסוֹד לִתְשׁוּבָה מִן-מַעֲשִׂים אֲשֶׁר מָוֶת בָּם אוֹ אֱמוּנַת אֱלֹהִים׃ 2 אוֹ דִין הַטְּבִילוֹת וּסְמִיכַת יָדָיִם וּתְקוּמַת הַמֵּתִים וּמִשְׁפַּט עוֹלָם׃ 3 וַאֲנַחְנוּ נַעֲשֶׂה זֹּאת בִּרְצוֹת הָאֵל׃ 4 כִּי אֵלֶּה אֲשֶׁר כְּבָר אֹרוּ עֵינֵיהֶם וַיִּטְעֲמוּ אֶת-מַתַּת שָׁמַיִם וְרוּחַ הַקֹּדֶשׁ הָיְתָה לִמְנָת חֶלְקָם׃ 5 וַיִּטְעֲמוּ אֶת-דְּבַר אֱלֹהִים הַטּוֹב וְאֶת-נִפְלְאוֹת הָעוֹלָם הֶעָתִיד׃ 6 וְאַחֲרֵי-כֵן סֹרֲרוּ לֹא יִתָּכֵן לָהֶם עוֹד לְהִתְחַדֵּשׁ וְלָשׁוּב כִּי הִצְלִיבוּ לָהֶם מֵחָדָשׁ אֶת-בֶּן-הָאֱלֹהִים וַיּשִׂימוּ אוֹתוֹ לְחֶרְפָּה׃ 7 כִּי הָאָרֶץ הַשֹּׁתָה אֶת-הַגֶּשֶׁם אֲשֶׁר הִרְוָה אֹתָהּ כְּפַעַם בְּפַעַם וְתֵלֵד זֶרַע טוֹב לַזֹּרֵעַ תִּשָּׂא בְרָכָה מֵאֵת הָאֱלֹהִים׃ 8 וְכִי-תַצְמִיחַ קוֹץ וְדַרְדַּר אֵין חֵפֶץ בָּהּ צְפוּיָה הִיא אֱלֵי-מְאֵרָה וְאַחֲרִיתָהּ לְבָעֵר׃ 9 אָמֵן הוֹחַלְנוּ יְדִידִים כִּי דְבָרִים טוֹבִים מֵאֵלֶּ נִמְצָאִים בָּכֶם דְּבָרִים צְפוּיִם אֱלֵי-יְשׁוּעָה אַף כִּי-כָזֹאת דִּבַּרְנוּ׃ 10 כִּי לֹא יְעַוֵּל הָאֱלֹהִים וְלֹא יִשְׁכַּח אֶת-מַעֲשֵׂיכֶם וְאֶת-הָאַהֲבָה אֲשֶׁר הֶרְאֵיתֶם לִשְׁמוֹ סֹמְכִים הֱיִיתֶם לִקְדשָׁיו וְעוֹדְכֶם כֵּן גַּם-הַיּוֹם׃ 11 וְחֶפְצֵנוּ כִּי אִישׁ אִישׁ מִכֶּם יִוָּדַע מִמְּגַמַּת עֲמָלוֹ כִּי תִקְוָתוֹ נֶאֱמָנָה עַד-הַקֵּץ׃ 12 וְלֹא תִהְיוּ עֲצֵלִים כִּי אִם-תֵּלְכוּן בְּעִקְּבוֹת אֵלֶּה אֲשֶׁר בֶּאֱמוּנָתָם וְאֹרֶךְ רוּחָם יָרְשׁוּ אֶת-הַהַבְטָחוֹת׃ 13 כִּי כַאֲשֶׁר הִבְטִיחַ אֱלֹהִים אֶת-אַבְרָהָם וְאֵין גָּדוֹל מִמֶּנּוּ לְהִשָּׁבַע בּוֹ נִשְׁבַּע בְּנַפְשׁוֹ׃ 14 וַיֹּאמַר כִּי-בָרֵךְ אֲבָרֶכְךָ וְהַרְבָּה אַרְבֶּה אוֹתָךְ׃ 15 וּבְכֵן הוֹחִיל בְּאֹרֶךְ רוּחוֹ וַיִּנְחַל אֶת-הַהַבְטָחָה׃ 16 כִּי אָמְנָם אֲנָשִׁים נִשְׁבָּעִים בְּגָדוֹל מֵהֶם וְתֹקֶף הַשְּׁבוּעָה יָבִיא קֵץ לְכָל-רִיב בֵּינֵיהֶם׃ 17 וְכֵן כַּאֲשֶׁר חָפֵץ הָאֱלֹהִים בְּכָל-תֹּקֶף לְהַרְאוֹת אֶת-יוֹרְשֵׁי הַהַבְטָחָה כִּי עֲצָתוֹ אֵין לְהָשִׁיב עָרַב לִפְנֵיהֶם בִּשְׁבוּעָתוֹ׃ 18 וּבִשְׁתֵּי אֲמָרוֹת אֵלֶּה אֲשֶׁר אֵין חֲלִיפוֹת לָהֵן מִבִּלְתִּי יְכֹלֶת הָאֱלֹהִים לְכַזֵּב נִמְצָא לָנוּ נֹחַם-עֹז הַמְמַלְּטִים אֶת-נַפְשֵׁנוּ לְהַחֲזִיק בַּתִּקְוָה הָעֲרוּכָה לְפָנֵינוּ׃ 19 אֲשֶׁר-הָיְתָה לָּנוּ עוֹגִין לְנֶפֶשׁ נֶאֱמָן וְחָזָק וּמַגִּיעַ אֶל-מִבֵּית לַפָּרֹכֶת׃ 20 אֲשֶׁר-שָׁם בָּא יֵשׁוּעַ הָרָץ לְפָנֵינוּ אֲשֶׁר-הָיָה לְכֹהֵן גָּדוֹל לְעוֹלָם עַל-דִּבְרָתִי מַלְכִּי-צֶדֶק׃

ז    1 כִּי זֶה מַלְכִּי-צֶדֶק מֶלֶךְ שָׁלֵם כֹּהֵן לְאֵל עֶלְיוֹן אֲשֶׁר יָצָא לִקְרַאת אַבְרָהָם אַחֲרֵי שׁוּבוּ מֵהַכּוֹת אֶת-הַמְּלָכִים וַיְבָרְכֵהוּ׃ 2 וַאֲשֶׁר חָלַק-לוֹ אַבְרָהָם מַעֲשֵׂר מִכֹּל וּפֵשֶׁר שְׁמוֹ בְּרֹאשׁ מֶלֶךְ צֶדֶק וְגַם-כֵּן מֶלֶךְ שָׁלֵם הוּא מֶלֶךְ הַשָּׁלוֹם׃ 3 בְּלֹא-אָב בְּלֹא-אֵם בְּלֹא יַחַשׂ וְאֵין לוֹ תְּחִלַּת הַיָּמִים וְאַף לֹא קֵץ הַחַיִּים וְדוֹמֶה לְבֶן-הָאֱלֹהִים הוּא עֹמֵד כֹּהֵן לְעוֹלָם׃ 4 וּרְאוּ-נָא מַה-נִּכְבָּד הוּא אֲשֶׁר אַבְרָהָם רֹאשׁ הָאָבוֹת נָתַן-לוֹ מַעֲשֵׂר מֵרֵאשִׁית הַשָּׁלָל׃ 5 וְאָמֵן יוֹרְשֵׁי הַכְּהֻנָּה מִבְּנֵי לֵוִי לָהֶם הַמִּשְׁפָּט לָקַחַת מַעֲשֵׂר עַל-פִּי הַתּוֹרָה מֵאֵת הָעָם מֵאֵת אֲחֵיהֶם אַף כִּי-יֹצְאֵי יֶרֶךְ אַבְרָהָם הֵם׃ 6 וְזֶה אֲשֶׁר לֹא הִתְיַחֵשׂ לְמִשְׁפְּחֹתָם לָקַח מַעֲשֵׂר מֵאַבְרָהָם וְגַם-בֵּרַךְ אֹתוֹ אֲשֶׁר הַהַבְטָחָה נְתוּנָה לוֹ מֵאָז׃ 7 וְדָבָר יָדוּעַ הוּא מֵאֵין פֹּצֶה פֶה כִּי הַקָּטֹן יְבֹרַךְ מִן-הַגָּדוֹל׃ 8 וּפֹה לֹקְחִים מַעֲשֵׂר אֲנָשִׁים בְּנֵי תְמוּתָה וְשָׁם זֶה הוּא אֲשֶׁר עֵדוּת לוֹ כִּי הוּא חָי׃ 9 וְאִם תִּשְׂאוּ נִיב שְׂפָתָי גַּם-לֵוִי הַלֹּקֵחַ מַעֲשֵׂר נָתַן מַעֲשֵׂר בְּתוֹךְ אַבְרָהָם׃ 10 כִּי בְּיֶרֶךְ אָבִיו הָיָה בְּצֵאת מַלְכִּי-צֶדֶק לִקְרָאתוֹ׃ 11 וְאִם תַּכְלִית כָּל-חֵפֶץ נִמְצְאָה בִּכְהֻנַּת בְּנֵי לֵוִי אֲשֶׁר בְּיָמֶיהָ נִתְּנָה הַתּוֹרָה לָעָם מַה-לְּכֹהֵן אַחֵר כִּי יָקוּם עַל-דִּבְרָתִי מַלְכִּי-צֶדֶק וְלֹא יִקָּרֵא עַל-דִּבְרָתִי אַהֲרֹן׃ 12 כִּי בְהִשְׁתַּנּוֹת הַכְּהֻנָּה גַּם-חֲלִיפַת הַתּוֹרָה בֹּא תָבוֹא אֶל-נָכוֹן׃ 13 וְהִנֵּה-זֶה אֲשֶׁר-יְדֻבַּר בּוֹ כָזֹאת בֶּן-שֵׁבֶט אַחֵר הוּא אֲשֶׁר אֵין אִישׁ מִמֶּנּוּ קָרֵב אֶל-הַמִּזְבֵּחַ׃ 14 כִּי מוּדַעַת זֹאת כִּי מִיהוּדָה צָמַח אֲדֹנֵינוּ וְעַל-שֵׁבֶט זֶה לֹא-דִבֶּר משֶׁה מְאוּמָה עַל-אֹדוֹת הַכְּהֻנָּה׃ 15 וְגַם-זֹאת מוּדַעַת בְּיֶתֶר מִדָּה כִּי יָקוּם כֹּהֵן אַחֵר בִּדְמוּת מַלְכִּי-צֶדֶק׃ 16 אֲשֶׁר אֵינֶנּוּ לְפִי מִצְוַת הַתּוֹרָה לְחַיֵּי בְשָׂרִים כִּי אִם-לְפִי הַגְּבוּרָה לְחַיֵּי אֵין-סוֹף׃ 17 כִּי-הֵעִיד לֵאמֹר אַתָּה כֹהֵן לְעוֹלָם עַל-דִּבְרַתִי מַלְכִּי-צֶדֶק׃ 18 כִּי אָמְנָם יֵשׁ תְּנוּאָה לַדָּת הַנְּתוּנָה מִקֶּדֶם אֲשֶׁר הָיְתָה מִבְּלִי-כֹחַ וְלִבְלִי הוֹעִיל׃ 19 כִּי הַתּוֹרָה לֹא בִצְּעָה דָּבָר לְתַכְלִיתוֹ כִּי אִם-אֵת אֲשֶׁר עַל-יָדָהּ בָּאָה תִקְוָה טוֹבָה מִמֶּנָּה אֲשֶׁר בָּהּ נִקְרַב אֶל-הָאֱלֹהִים׃ 20 וּבַאֲשֶׁר יֵשׁוּעַ לֹא הָיָה לְכֹהֵן מִבְּלִי שְׁבוּעָה׃ 21 כִּי הֵמָּה הָיוּ לְכֹהֲנִים מִבְּלִי שְׁבוּעָה וְזֶה בִּשְׁבוּעָה עַל-פִּי הָאֹמֵר אֵלָיו נִשְׁבַּע יְהוָֹה וְלֹא יִנָּחֵם אַתָּה-כֹהֵן לְעוֹלָם עַל-דִּבְרָתִי מַלְכִּי-צֶדֶק׃ 22 אֲשֶׁר לָזֹאת יֵשׁוּעַ הוּא הָעֵרָבוֹן לַבְּרִית הַטּוֹבָה מִן-הָרִאשֹׁנָה׃ 23 וְרַבִּים הָיוּ כֹהֲנֶיהָ הָהֵם כִּי לֹא יָכְלוּ לָשֶׁבֶת לָעַד מִפְּנֵי הַמָּוֶת׃ 24 וְזֶה יַעַן כִּי יֵשֵׁב לְעוֹלָם גַּם-כְּהֻנָּתוֹ לֹא תַעֲבֹר מִמֶּנּוּ׃ 25 וּבַעֲבוּר זֹאת רַב הוּא לְהוֹשִׁיעַ תְּשׁוּעַת נֶצַח לְכָל-הַבָּאִים עַל-יָדוֹ לֵאלֹהִים כִּי הוּא חַי לָנֶצַח לְהַפְגִּיעַ בַּעֲדָם׃ 26 כִּי טוֹב לָנוּ כֹהֵן גָּדוֹל קָדוֹשׁ כָּמוֹהוּ נְקִי כַפַּיִם וּבַר לְבָב נִבְדָּל מֵחַטָּאִים וְנִשָּׂא מֵעַל הַשָּׁמָיִם׃ 27 אֲשֶׁר אֵין-לוֹ חֹק יוֹם יוֹם כַּכֹּהֲנִים הַגְּדוֹלִים לְהַקְרִיב קָרְבָּן בַּתְּחִלָּה עַל-חַטַּאת נַפְשׁוֹ וְאַחֲרֵי-כֵן בְּעַד הָעָם כִּי הִשְׁלִים אֶת-זֹאת בְּפַעַם אַחַת בְּהַקְרִיב אֶת-נַפְשׁוֹ׃ 28 כִּי הַתּוֹרָה הֵקִימָה אֲנָשִׁים לְכֹהֲנִים גְּדוֹלִים אֲשֶׁר רִפְיוֹנָם בָּם אַךְ דְּבַר-הַשְּׁבוּעָה אַחֲרֵי הַתּוֹרָה הֵקִים אֶת-הַבֵּן אֲשֶׁר נַעֲלֶה הוּא בִּשְׁלֵמוּת נֶצַח׃

ח    1 סוֹף דָּבָר הַכֹּל נִשְׁמָע יֶשׁ-לָנוּ כֹהֵן גָּדוֹל הַיֹּשֵׁב לִימִין כִּסֵּא הַכָּבוֹד בַּשָּׁמָיִם׃ 2 מְשָׁרֵת בַּקֹּדֶשׁ וּבְמִשְׁכָּן אֱמֶת אֲשֶׁר הֶאֱהִיל יְהוָֹה וְלֹא אָדָם׃ 3 וְכָל-כֹּהֵן גָּדוֹל יָעֳמַד לְהַקְרִיב מִנְחָה וָזָבַח וְעַל-כֵּן נָכוֹן לִהְיוֹת גַּם-לוֹ קָרְבָּן אֲשֶׁר יַקְרִיב׃ 4 וְאִלּוּ הָיָה בָאָרֶץ לֹא הָיָה כֹהֵן מִפְּנֵי הַכֹּהֲנִים הַמַּקְרִיבִים כָּל-קָרְבָּן כַּתּוֹרָה׃ 5 הַמְכַהֲנִים בַּמִּקְדָּשׁ אֲשֶׁר הוּא דְמוּת וְצֵל לַאֲשֶׁר בַּמָּרוֹם כַּאֲשֶׁר צֻוָּה משֶׁה מִפִּי אֱלֹהִים בַּעֲשׁתוֹ וְאֶת-הַמִּשְׁכָּן כִּי אָמַר רְאֵה וַעֲשֵׂה כֹל כַּתַּבְנִית אֲשֶׁר אַתָּה מָרְאֶה בָּהָר׃ 6 וְעַתָּה הוּא לָקַח-לוֹ כְהֻנָּה נִשְׂגָּבָה מִזֹּאת כַּאֲשֶׁר גַּם-הַבְּרִית אֲשֶׁר הוּא לְמֵלִיץ לָהּ נִשְׂגָּבָה מִן-הָרִאשֹׁנָה וּנְתוּנָה עֲלֵי-הַבְטָחוֹת טוֹבוֹת מִן-הָרִאשֹׁנוֹת׃ 7 כִּי לוּ הָיְתָה הַבְּרִית הָרִאשֹׁנָה בְלִי חֶסְרוֹן הֲלֹא לֹא-יְבֻקַּשׁ מָקוֹם לִשְׁנִיָּה׃ 8 אַךְ בִּמְצֹא חֶסְרוֹן אָמַר אֲלֵיהֶם הִנֵּה יָמִים בָּאִים נְאֻם-יְהוָֹה וְכָרַתִּי אֶת-בֵּית יִשְׂרָאֵל וְאֶת-בֵּית יְהוּדָה בְּרִית חֲדָשָׁה׃ 9 לֹא כַבְּרִית אֲשֶׁר כָּרַתִּי אֶת-אֲבוֹתָם בְּיוֹם הֶחֱזִיקִי בְיָדָם לְהוֹצִיאָם מֵאֶרֶץ מִצְרָיִם אֲשֶׁר-הֵמָּה הֵפֵרוּ אֶת-בְּרִיתִי וְאָנֹכִי בָּחַלְתִּי בָם נְאֻם-יְהוָֹה׃ 10 כִּי זֹאת הַבְּרִית אֲשֶׁר אֶכְרֹת אֶת-בֵּית יִשְׂרָאֵל אַחֲרֵי הַיָּמִים הָהֵם נְאֻם-יְהוָֹה נָתַתִּי אֶת-תּוֹרָתִי בְּקִרְבָּם וְעַל-לִבָּם אֶכְתֳּבֶנָּה וְהָיִיתִי לָהֶם לֵאלֹהִים וְהֵמָּה יִהְיוּ-לִי לְעָם׃ 11 וְלֹא יְלַמְּדוּ עוֹד אִישׁ אֶת-רֵעֵהוּ וְאִישׁ אֶת-אָחִיו לֵאמֹר דְּעוּ אֶת-יְהוָֹה כִּי כוּלָּם יֵדְעוּ אֹתִי לְמִקְּטַנָּם וְעַד-גְּדוֹלָם׃ 12 כִּי אֶסְלַח לַעֲוֹנָם וּלְחַטָּאתָם וּלְפִשְׁעֵיהֶם לֹא אֶזְכָּר-עוֹד׃ 13 בְּאָמְרוֹ בְּרִית חֲדָשָׁה בִּלָּה אֶת-הָרִאשֹׁנָה וְהַבָּלָה וְהַנּוֹשֶׁנֶת קָרוֹב קִצָּהּ׃

ט    1 אוּלָם גַּם-הַבְּרִית הָרִאשֹׁנָה הָיוּ לָהּ חֻקֵּי עֲבוֹדַת-אֵל וּמִקְדַּשׁ מַטָּה בָּאָרֶץ׃ 2 כִּי נַעֲשָׂה הַמִשְׁכָּן הַחִיצוֹן אֲשֶׁר שָׁם הַמְּנוֹרָה וְהַשֻּׁלְחָן וְלֶחֶם הַפָּנִים וְהוּא נִקְרָא קֹדֶשׁ׃ 3 וּמִבֵּית לַפָּרֹכֶת מִשְׁכָּן הַנִּקְרָא קֹדֶשׁ הַקֳּדָשִׁים׃ 4 שָׁם מַחְתַּת הַזָּהָב וַאֲרוֹן הַבְּרִית מְצֻפֶּה זָהָב סָבִיב וְצִנְצֶנֶת זָהָב אֲשֶׁר הַמָּן בְּתוֹכָהּ וּמַטֵּה אַהֲרֹן אֲשֶׁר פָּרַח וְלוּחֹת הַבְּרִית׃ 5 וּמִלְמַעְלָה כְּרוּבֵי הַכָּבוֹד סֹכְכִים עַל-הַכַּפֹּרֶת וְאֵין לָנוּ עַתָּה לְדַבֵּר עַל-כָּל-חֵלֶק וְחֵלֶק לְבַדּוֹ׃ 6 וְכַאֲשֶׁר נַעֲשׂוּ אֵלֶּה בָּאוּ תָמִיד הַכֹּהֲנִים עֹבְדֵי עֲבֹדָה אֶל-הַמִּשְׁכָּן הַחִיצוֹן׃ 7 וְאֶל-הַפְּנִימִי בָּא הַכֹּהֵן הַגָּדוֹל לְבַדּוֹ פַּעַם אַחַת בַּשָּׁנָה לֹא בִּבְלִי-דָם אֲשֶׁר הִזָּה לְכַפֵּר בַּעֲדוֹ וּבְעַד שִׁגְגוֹת הָעָם׃ 8 בְּזֹאת הוֹדִיעַ רוּחַ הַקֹּדֶשׁ כִּי עוֹד לֹא נִפְתַּח הַדֶּרֶךְ לְקֹדֶשׁ הַקֳּדָשִׁים כָּל-עוֹד הַמִשְׁכָּן הָרִאשׁוֹן עֹמֵד עַל-מְכוֹנוֹ׃ 9 וְזֶה הוּא לְמשָׁל לַזְּמָן הַזֶּה בְּהַקְרִיבָם מִנְחָה וָזֶבַח אֲשֶׁר אֵין בָּם לְהָכִין לֵבָב שָׁלֵם אֶל-הָעֹבְדִים׃ 10 כִּי חֻקּוֹת הַגּוּף הֵם עִם-מַאֲכָל וּמִשְׁתֶּה וּטְבִילוֹת שֹׁנוֹת אֲשֶׁר נִתְּנוּ עַד-עֵת הַתִּקּוּן׃ 11 אֲבָל בְּבֹא הַמָּשִׁיחַ לִהְיוֹת לְכֹהֵן גָּדוֹל עַל-הַטֹּבוֹת הָעֲתִידוֹת בַּמִּשְׁכָּן הַגָּדוֹל וְהַשָּׁלֵם אֲשֶׁר אֵינֶנּוּ מַעֲשֶׂה יָדַיִם וְאֵינֶנּוּ מֵהַבְּרִיאָה הַלֵּזוּ׃ 12 הוּא בָא פַעַם אַחַת אֶל-הַקֹּדֶשׁ לֹא בְדַם שְׂעִירִים וַעֲגָלִים כִּי אִם-בְּדַם נַפְשׁוֹ וַיִּמְצָא פְּדוּת עוֹלָם׃ 13 וְאִם דַּם שְׂעִירִים וּפָרִים וְאֵפֶר הַפָּרָה זֹרַק עַל-הַטָּמֵא יְטַהֵר אֶת-בְּשָׂרוֹ וְיקַדְּשֵׁהוּ׃ 14 אַף כִּי-דַם הַמָּשִׁיחַ אֲשֶׁר בְּרוּחַ עוֹלָם הִקְרִיב אֶת-נַפְשׁוֹ בִּבְלִי-מוּם לֵאלֹהִים יְטַהֵר אֶת-לִבְּכֶם מִן-מַעֲשִׂים אֲשֶׁר מָוֶת בָּם לַעֲבֹד אֶת-אֱלֹהִים חַיִּים׃ 15 בַּעֲבוּר זֹאת מַלְאָךְ מֵלִיץ הוּא לַבְּרִית הַחֲדָשָׁה וּמוֹתוֹ נִמְצָא לְכַפָּרַת הַפּשְׁעִים תַּחַת הַבְּרִית הָרִאשֹׁנָה לְמַעַן יַשִּׂיגוּ בְחִירֵי-יָהּ אֶת-הַבְטָחַת נַחֲלַת עוֹלָם׃ 16 כִּי בְצַוָּאַת הַמַּנְחִיל יֶחְסַר מוֹת הַמַּנְחִיל׃ 17 וְצַוָּאת הַמַנְחִיל תָּקוּם אַךְ אַחֲרֵי הַמָּוֶת יַעַן אֵין לָהּ תֹּקֶף בְּחַיֵּי הַמַּנְחִיל׃ 18 וְלָכֵן גַּם-חֲנֻכַּת הַבְּרִית הָרִאשֹׁנָה לֹא נֶעֶשְׂתָּה בִּבְלִי-דָם׃ 19 כִּי כַאֲשֶׁר נֶאֶמְרָה כָל-מִצְחָה כְּפִי הַתּוֹרָה לְכָל-הָעָם בְּיַד-משֶׁה לָקַח דַּם עֲגָלִים וּשְׂעִירִים עִם-מַיִם וּשְׁנִי תוֹלַעַת וְאֵזוֹב וַיִּזְרֹק עַל-הַסֵּפֶר וְעַל-הָעָם׃ 20 וַיֹּאמַר הִנֵּה דַם-הַבְּרִית אֲשֶׁר צִוָּה אֶתְכֶם אֱלֹהִים׃ 21 וְכֵן עַל-הַמִּשְׁכָּן וְעַל-כָּל-כְּלֵי הַשָּׁרֵת זָרַק אֶת-הַדָּם׃ 22 וְכִמְעַט הַכֹּל לְפִי הַתּוֹרָה יִטְהַר בַּדָּם ובִבְלִי שְׁפָךְ-דָּם אֵין סְלִיחָה׃ 23 וְלָכֵן נָכוֹן הָיָה לְטַהֵר כָּזֹאת אֶת-הַדְּבָרִים אֲשֶׁר תַּבְנִית הֵם לַאֲשֶׁר בַּמָּרוֹם אֲבָל הַדְּבָרִים עַצְמָם בַּמָּרוֹם בִּזְבָחִים טוֹבִים מֵאֵלֶּה׃ 24 כִּי לֹא בָא הַמָּשִׁיחַ אֶל-הַמִּקְדָּשׁ מַעֲשֵׂה יָדַיִם אֲשֶׁר תַּבְנִית הוּא לְמִקְדָּשׁ אֱמֶת כִּי אִם-בָּא אֶל-עֶצֶם הַשָּׁמַיִם לְהֵרָאוֹת עַתָּה בַּעֲדֵנוּ לִפְנֵי הָאֱלֹהִים׃ 25 גַּם-לֹא לְהַקְרִיב אֶת-נַפְשׁוֹ פְּעָמִים רַבּוֹת כַּכֹּהֵן הַגָּדוֹל הַבָּא אֶל-הַקֹּדֶשׁ שָׁנָה בְשָׁנָה בְּדַם לֹא-לוֹ׃ 26 כִּי אִם-כֵּן הָיָה לוֹ לְהִתְעַנּוֹת פְּעָמִים רַבּוֹת לְמִן הִוָּסֵד אָרֶץ אַךְ עַתָּה בְּקֵץ הַדֹּרוֹת נִגְלָה פַעַם אַחַת לְהָתֵם הַטָּאוֹת בְּזֶבַח נַפְשׁוֹ׃ 27 וְכַאֲשֶׁר נִגְזַר עַל-בְּנֵי אָדָם לָמוּת פַּעַם אַחַת וְאַחֲרֵי-כֵן הַמִּשְׁפָּט׃ 28 כֵּן גַּם-הַמָּשִׁיחַ הִקְרִיב אֶת-נַפְשׁוֹ פַעַם אַחַת לָשֵׂאת חֵטְא רַבִּים וּבִבְלִי חַטָּאת יֵרָאֶה שֵׁנִית לַמְחַכִּים-לוֹ לִתְשׁוּעָה׃

י    1 כִּי הַתּוֹרָה אֲשֶׁר בָּהּ רַק צֵל טֹבוֹת הָעֲתִידוֹת וְלֹא פְנֵי עֶצֶם הַטֹּבוֹת הָהֵנָּה אֵין בְּכֹחָהּ לְהָכִין שָׁלֵם לַנִּגָּשִׁים בַּזְּבָחִים הָאֵלֶּה אֲשֶׁר יַקְרִיבוּ תָמִיד שָׁנָה בְשָׁנָה׃ 2 כִּי אִם-לֹא-כֵן הֲלֹא יֶחְדְּלוּ מֵהַקְרִיבָם עוֹד כִּי אַחֲרֵי אֲשֶׁר הִטַּהֲרוּ הָעֹבְדִים פַעַם אַחַת אֵין לָהָם עוֹד מַחְשֶׁבֶת הַחֵטְא׃ 3 אוּלָם בַּקָּרְבָּנוֹת הָאֵלֶּה יֶשׁ-זֵכֶר לַחֲטָאִים שָׁנָה בְשָׁנָה׃ 4 כִּי אֵין בְּדַם פָּרִים וּשְׂעִירִים לִנְשׂא חֲטָאִים׃ 5 עַל-כֵּן בְּבֹאוֹ אֶל-תֵּבֵל אַרְצָה אָמָר זֶבַח וּמִנְחָה לֹא חָפַצְתָּ גּוּף כּוֹנַנְתָּ לִּי׃ 6 עוֹלָה וַחֲטָּאָה לֹא שָׁאָלְתָּ׃ 7 אָז אָמַרְתִּי הִנֵּה-בָאתִי בִּמְגִלַּת-סֵפֶר כָּתוּב עָלָי לַעֲשׂוֹת רְצוֹנְךָ אֱלֹהָי׃ 8 בְּאָמְרוֹ מֵרֹאשׁ זֶבַח וּמִנְחָה וְעוֹלָה וַחֲטָאָה לֹא חָפַצְתָּ וְלֹא שָׁאָלְתָּ וְהֵם הֵמָּה הַמּוּבָאִים לְפִי הַתּוֹרָה׃ 9 אָז יֹאמַר הִנֵּה-בָאתִי לַעֲשׂוֹת רְצוֹנְךָ הֵסִיר אֶת-הָרִאשֹׁנָה לְמַעַן הָקֵם אֶת-הַשְּׁנִיָּה׃ 10 וּבָרָצוֹן הַזֶּה אָנוּ מִתְקַדְּשִׁים בְּקָרְבַּן נֶפֶשׁ יֵשׁוּעַ הַמָּשִׁיחַ אֲשֶׁר הִקְרִיב פַּעַם אֶחָת׃ 11 וְכָל-כֹּהֵן עֹמֵד לְשָׁרֵת יוֹם יוֹם וּלְהַקְרִיב פְּעָמִים שֹׁנוֹת אֶת-הַזְּבָחִים הָהֵמָּה אֲשֶׁר אֵין בָּם מֵעוֹלָם לְכַפֵּר עַל-חֲטָאִים׃ 12 אֲבָל הוּא הִקְרִיב זֶבַח אֶחַד עַל-הַחֲטָאִים וַיֵּשֶׁב לִימִין אֱלֹהִים עַד-עוֹלָם׃ 13 וּמֵאָז הוּא מְיַחֵל עַד-יוּשְׁתוּ אֹיְבָיו הֲדֹם לְרַגְלָיו׃ 14 כִּי בְקָרְבָּן אֶחָד הִשְׁלִים אֶת-הַמְקֻדָּשִׁים עַד-עוֹלָם׃ 15 וְגַם-רוּחַ הַקֹּדֶשׁ יָעֶד-לָנוּ כָזֹאת כִּי אַחֲרֵי אָמְרוֹ׃ 16 זֹאת הַבְּרִית אֲשֶׁר אֶכְרֹת אִתָּם אַחֲרֵי הַיָּמִים הָהֵם נְאֻם-יְהוָֹה נָתַתִּי אֶת-תּוֹרָתִי בְּקִרְבָּם וְעַל-לִבָּם אֶכְתֳּבֶנָּה׃ 17 יוֹסִיף יֹאמַר וְלַעֲוֹנָם וּלְחַטָּאתָם לֹא אֶזְכָּר-עוֹד׃ 18 וּבַאֲשֶׁר יֶשׁ-שָׁם סְלִיחָה לָאֵלֶּה אֵין מָקוֹם לְקָרְבָּן עָל-הַחֵטְא׃ 19 עַל-כֵּן אֶחָי בִּהְיוֹת לָנוּ בִטָּחוֹן לָבֹא אֶל-הַקֹּדֶשׁ בְּדַם יֵשׁוּעַ׃ 20 אֲשֶׁר חָנַךְ מְסִלָּה חֲדָשָׁה לָנוּ מְסִלַּת חַיִּים דֶּרֶךְ הַפָּרֹכֶת אֲשֶׁר בְּשָׂרוֹ הוּא׃ 21 וּבִהְיוֹת לָנוּ כֹּהֵן גָּדוֹל עַל-בֵּית הָאֱלֹהִים׃ 22 נִגְּשָׁה בְּלֵב שָׁלֵם וּבֶאֱמוּנָה אֹמֶן מְטֹהָרִים מֵרַעְיוֹן רָע בְּלִבֵּנוּ אֲשֶׁר זֹרַק עָלָיו וּבְשָׂרֵנוּ אֲשֶׁר רֻחַץ בְּמַיִם טְהוֹרִים׃ 23 וְנִשְׁמֹר הֵיטֵב שְׁבוּעַת פִּינוּ עַל-דְּבַר תִּקְוָתֵנוּ וְלֹא נֶרֶף כִּי נֶאֱמָן הוּא הַמַּבְטִיחַ׃ 24 וְנִתְבּוֹנְנָה אִישׁ אֶל-רֵעֵהוּ לְהִתְעוֹרֵר לְאַהֲבָה וּלְמַעֲשִׂים טוֹבִים׃ 25 וְלֹא נֶחְדַּל מִבֹּא אֶל-קְהִלָּתֵנוּ כְּדֶרֶךְ אֲנָשִׁים אֲחָדִים מִכֶּם כִּי אִם-נוֹכִיחַ אִישׁ אֶת-עֲמִיתוֹ וּמַה גַּם-בִּרְאֹתְכֶם כִּי-קָרוֹב הַיּוֹם׃ 26 כִּי אִם-נֶחְטָא בְזָדוֹן אַחֲרֵי אֲשֶׁר קָנִינוּ דַעַת הָאֱמֶת לֹא-יִשָּׁאֶר עוֹד קָרְבָּן עַל-חַטָּאתֵנוּ׃ 27 כִּי אִם-מָגוֹר מִפְּנֵי מִשְׁפָּט הַצָּפוּי וְאֵשׁ קִנְאָה אֲשֶׁר תֹּאכַל צָרִים׃ 28 הָעֹבֵר תּוֹרַת משֶׁה יוּמַת בְּלִי-חֶמְלָה עַל-פִּי שְׁנַיִם אוֹ-שְׁלשָׁה עֵדִים׃ 29 הִתְבּוֹנְנוּ-נָא מַה-נּוֹרָא הָעֹנֶשׁ אֲשֶׁר יוּשַׁת עַל-רֹמֵס בֶּן-אֱלֹהִים וּמְטַמֵּא דַם בְּרִית אֲשֶׁר נִקְדַּשׁ בּוֹ וּמְגַדֵּף רוּחַ נְדִיבָה׃ 30 כִּי-יָדַעְנוּ מִי הוּא הָאֹמֶר לִי נָקָם אֲנִי אֲשַׁלֵּם אָמַר יְהוָֹה וְאֹמֵר עוֹד כִּי יָדִין יְהוָֹה עַמּוֹ׃ 31 מַה-נּוֹרָא לִנְפֹּל בְּיַד אֱלֹהִים חַיִּים׃ 32 זִכְרוּ-נָא יָמִים מִקֶּדֶם כַּאֲשֶׁר אֹרוּ עֵינֵיכֶם וְשׁוֹט שׁוֹטֵף צָרָה עָבַר עֲלֵיכֶם׃ 33 פַּעַם הֱיִיתֶם לְרַאֲוָה מֵעֹנִי וְקֶלֶס וּפַעַם דָּאֲבָה נַפְשְׁכֶם לְסִבְלוֹת אֲחֵיכֶם כָּכֶם׃ 34 כִּי נִכְמְרוּ רַחֲמֵיכֶם אֶל-מוֹסֵרָי וְהוֹנְכֶם הַגָּזוּל מִכֶּם הִנַּחְתֶּם בְּטוּב-לֵב בְּדַעְתְּכֶם כִּי קִנְיָן גָּדוֹל מִזֶּה יֶשׁ-לָכֶם בַּשָּׁמַיִם הָעֹמֵד לָעַד׃ 35 עַל-כֵּן אַל-תַּשְׁלִיכוּ מִבְטַחֲכֶם כִּי שְׂכָרוֹ הַרְבֵּה מְאֹד׃ 36 וְכִי גַם-הַתּוֹחֶלֶת נְכוֹנָה לָכֶם בַּעֲבוּר אֲשֶׁר תַּעֲשׂוּ רְצוֹן אֱלֹהִים וְתַשִּׂיגוּ אֵת אֲשֶׁר-דִּבֵּר לָכֶם׃ 37 כִּי עוֹד מְעַט-רָגַע וְהַבָּא יָבֹא לֹא יְאַחֵר׃ 38 וְצַדִּיק בֶּאֱמוּנָתוֹ יִחְיֶה וְאִם-יִסֹּג אָחוֹר לֹא-תִרֶץ נַפְשִׁי בּוֹ׃ 39 וַאֲנַחְנוּ אֵינֶנּוּ מִן-הַנְּסוֹגִים אָחוֹר לַאֲבַדּוֹן כִּי אִם-מִבְּנֵי אֱמוּנָה לְהַצִּיל אֶת-הַנָּפֶשׁ׃

יא    1 וְהָאֱמוּנָה מִבְטַח-עֹז בַּדָּבָר חִכִּנוּ לוֹ דָּבָר בָּחוּן בַּלֵּב וְלֹא תְשׁוּרֶנּוּ עָיִן׃ 2 כִּי בָזֹאת נִתְּנָה עֵדוּת לַזְּקֵנִים מִדּוֹר דּוֹר׃ 3 בָּאֱמוּנָה נָבִין כִּי בִּדְבַר אֱלֹהִים נַעֲשׂוּ שָׁמַיִם וָאָרֶץ וְכִי הַנִּמְצָאִים לְעֵינֵינוּ לֹא מֵחֹמֶר קַדְמוֹנִי נִבְרָאוּ׃ 4 בָּאֱמוּנָה הֵבִיא הֶבֶל קָרְבַּן מִנְחָה לֵאלֹהִים מִנְחָה טוֹבָה מִמִּנְחַת קָיִן אֲשֶׁר עַל-יָדָהּ נִתְּנָה לוֹ עֵדוּת כִּי צַדִּיק הָיָה בְּהָעִיד אֱלֹהִים עַל-מִנְחָתוֹ וְעַל-פִּיהָ עוֹדֶנּוּ דוֹבֵב אַחֲרֵי מֹתוֹ׃ 5 בָּאֱמוּנָה לֻקַּח חֲנוֹךְ מִבְּלִי רְאוֹת מָוֶת וְאֵינֶנּוּ כִּי-לָקַח אֹתוֹ אֱלֹהִים וּבְטֶרֶם הִלָּקְחוֹ נִתְּנָה לּוֹ עֵדוּת כִּי אֶת-הָאֱלֹהִים הִתְהַלָּךְ׃ 6 וּבְלֹא אֱמוּנָה לֹא-יוּכַל אִישׁ לְהָפִיק רָצוֹן מֵאֱלֹהִים כִּי הַבָּא לִפְנֵי אֱלֹהִים עָלָיו לְהַאֲמִין כִּי הוּא יֵשׁ וּמְשַׁלֵּם גְּמוּל לְדֹרְשָׁיו׃ 7 בָּאֱמוּנָה עָשָׂה נֹחַ אֶת-הַתֵּבָה וַיַּצֵּל אֶת-בֵּיתוֹ כִּי יָרֵא הָיָה אֶת-אֱלֹהָיו אֲשֶׁר הִזְהִירוֹ עַל-הָעֲתִידוֹת טֶרֶם בָּאוּ וְעַל-פִּיהָ הִרְשִׁיעַ אֶת-הָאָרֶץ וַיְהִי לְיוֹרֵשׁ הַצְּדָקָה בֶּאֱמוּנָתוֹ׃ 8 בָּאֱמוּנָה שָׁמַע אַבְרָהָם כַּאֲשֶׁר נִקְרָא לָלֶכֶת אֶל-הָאָרֶץ אֲשֶׁר עֻתַּד לְרִשְׁתָּהּ וַיֵּלֶךְ בִּבְלִי-דַעַת אָנָה הוּא בָא׃ 9 בָּאֱמוּנָה הִתְגּוֹרֵר בָּאָרֶץ הַנְּתוּנָה לוֹ כִּבְאֶרֶץ נָכְרִיָּה וַיֵּשֶׁב בְּאֹהָלִים הוּא וְיִצְחָק וְיַעֲקֹב יוֹרְשֵׁי הַהַבְטָחָה עִמּוֹ׃ 10 כִּי-חִכָּה לָעִיר אֲשֶׁר יְסוֹד עוֹלָם לָהּ וַאֲשֶׁר בּוֹנָהּ וְעֹשָׂהּ הוּא הָאֱלֹהִים׃ 11 בָּאֱמוּנָה גַּם-שָׂרָה הֶחֱלִיפָה-כֹחַ לְהַזְרִיעַ וַתֵּלֶד אַחֲרֵי בְּלֹתָהּ עֵקֶב אֲשֶׁר חָרְצָה כִּי הַמַּבְטִיחַ נֶאֱמָן הוּא׃ 12 וְעַל-כֵּן מֵאֶחָד הַהוּא הַקָּרוֹב לַמָּוֶת נוֹלְדוּ כְּכוֹכְבֵי הַשָּׁמַיִם לָרֹב וְכַחוֹל אֲשֶׁר עַל-שְׂפַת הַיָּם אֲשֶׁר לֹא יִסָּפֵר׃ 13 בָּאֱמוּנָה מֵתוּ כָל-אֵלֶּה וְלֹא רָאוּ אֶת-הַהַבְטָחוֹת בְּקִיּוּמָן כִּי אִם-מֵרָחוֹק חָזוּ אֹתָן וַיַּאֲמִינוּ וַיִּצְהֲלוּ לִקְרָאתָן וַיּוֹדוּ כִּי-גֵרִים וְתוֹשָׁבִים הֵם בָּאָרֶץ׃ 14 וְאֵלֶּה הָאֹמְרִים כָּזֹאת מוֹדִיעִים כִּי אֶרֶץ אֲשֶׁר לָהֵם הֵם מְבַקְשִׁים׃ 15 וְאִם הָאָרֶץ הַהִיא אֲשֶׁר יָצְאוּ מִמֶּנָּה עָלְתָה עַל-לִבָּם הֲלֹא הָיָה בְיָדָם לָשׁוּב אֵלֶיהָ׃ 16 אוּלָם טוֹבָה מִמֶּנָּה הִתְאַוּוּ וְהִיא בִשְׁמֵי מָעַל וְעַל-כֵּן לֹא בוֹשׁ הָאֱלֹהִים מֵהֶם לְהִקָּרֵא אֱלֹהֵיהֶם וַיָּכֶן-לָהֶם עִיר שָׁמָּה׃ 17 בָּאֱמוּנָה הֶעֱלָה אַבְרָהָם אֶת-יִצְחָק בְּיוֹם מַסָּה וְיֹרֵשׁ הַהַבְטָחוֹת הִקְרִיב אֶת-יְחִידוֹ לְעֹלָה׃ 18 אֲשֶׁר נֶאֱמַר עָלָיו כִּי בְיִצְחָק יִקָּרֵא לְךָ זָרַע׃ 19 וּבְלִבּוֹ אָמַר כִּי תַשִּׂיג יַד אֱלֹהִים לַהֲקִימוֹ מִן-הַמֵּתִים וְכֵן גַּם-הֱשִׁיבוֹ אֵלָיו וַיְהִי לְמוֹפֵת׃ 20 בָּאֱמוּנָה בֵּרַךְ יִצְחָק אֶת-יַעֲקֹב וְאֶת-עֵשָׂו וַיְדַבֵּר עַל-עֲתִדֹתָם׃ 21 בָּאֱמוּנָה בֵּרַךְ יַעֲקֹב בְּמֹתוֹ אֶת-שְׁנֵי בְנֵי-יוֹסֵף וַיִּשְׁתַּח עַל-רֹאשׁ הַמַּטֶּה׃ 22 בָּאֱמוּנָה הִזְכִּיר יוֹסֵף לִפְנֵי מוֹתוֹ אֶת-צֵאת בְּנֵי יִשְׂרָאֵל וַיְצַו עַל-אֹדוֹת עַצְמוֹתָיו׃ 23 בָּאֱמוּנָה נִצְפַּן משֶׁה שְׁלשָׁה יְרָחִים עַל-יְדֵי אֲבוֹתָיו בְּהִוָּלְדוֹ כִּי רָאוּ כִּי-טוֹב הַיֶּלֶד וְלֹא יָרְאוּ מִדָּת הַמֶּלֶךְ׃ 24 בָּאֱמוּנָה מֵאֵן משֶׁה בְגָדְלוֹ לְהִקָּרֵא בֵן לְבַת-פַּרְעֹה׃ 25 וַיִּבְחַר-לוֹ לְהִתְעַנּוֹת עִם-עַם אֱלֹהִים מֵהִתְעַנֵּג בְּתַעֲנוּגֵי הַחֵטְא בִּימֵי חָלֶד׃ 26 וְאֶת-חֶרְפָּתוֹ כְּחֶרְפַּת הַמָּשִׁיחַ חָשַׁב לְעשֶׁר גָּדוֹל מֵאֹצְרוֹת מִצְרָיִם כִּי צָפָה אֶל-הַגְּמוּל׃ 27 בָּאֱמוּנָה עָזַב אֶת-מִצְרַיִם וְלֹא יָרֵא מֵחֲמַת מַלְכָּהּ כִּי נָשָׂא אֶת-נַפְשׁוֹ אֵלָיו כְּרֹאֶה אֹתוֹ אֲשֶׁר פָּנָיו לֹא יֵרָאוּ׃ 28 בָּאֱמוּנָה עָשָׂה אֶת-הַפֶּסַח וְנָתוֹן אֶת-הַדָּם עַל-הַבָּתִים לְבִלְתִּי יִגַּע בָּם הַמַּשְׁחִית אֶת-הַבְּכֹרִים׃ 29 בָּאֱמוּנָה הָלְכוּ בְיַם-סוּף כְּמוֹ בַיָּבָּשָׁה וְהַמִּצְרִים הָלְכוּ אַחֲרֵיהֶם וַיִּשְׁקָעוּ׃ 30 בָּאֱמוּנָה נָפְלוּ חֹמוֹת יְרִיחוֹ בְּהָסֵב אֹתָן שִׁבְעַת יָמִים׃ 31 בָּאֱמוּנָה לֹא אָבְדָה רָחָב הַזּוֹנָה עִם-בְּנֵי בְלִיָּעַל כַּאֲשֶׁר אָסְפָה אֶת-הַמְרַגְּלִים אֶל-בֵּיתָהּ בְּשָׁלוֹם׃ 32 וּמָה אֹמַר עוֹד הֲלֹא תִקְצַר-לִי הָעֵת כִּי-אֲסַפֵּר מִדִּבְרֵי גִדְעוֹן בָּרָק שִׁמְשׁוֹן וְיִפְתָּח דָּוִד שְׁמוּאֵל וְהַנְּבִיאִים׃ 33 אֲשֶׁר בָּאֱמוּנָה כָּבְשׁוּ מַמְלָכוֹת פָּעֲלוּ צְדָקוֹת הִשִּׂיגוּ הַבְטָחוֹת וְסָכְרוּ פִּי אֲרָיוֹת׃ 34 כִּבּוּ חֲמַת אֵשׁ נִמְלְטוּ מִפִּי חֶרֶב מָצְאוּ אוֹן לָהֶם מִתּוֹךְ רִפְיוֹנָם עָשׂוּ חַיִל בַּמִּלְחָמָה וַיָּנִיסוּ מַחֲנוֹת זָרִים׃ 35 נָשִׁים מָצְאוּ אֶת-מֵתֵיהֶן כִּי קָמוּ מִן-הַמֵּתִים וְרַבִּים הִתְעַנּוּ וְלֹא מָצְאוּ פְלֵיטָה לְמַעַן יָקוּמוּ בְיוֹם הַתְּקוּמָה בְּיֶתֶר עֹז׃ 36 מִקְצוֹתָם נָשְׂאוּ קָלוֹן וּמַהֲלֻמּוֹת וְגַם-כְּבָלִים וּכְלָאִים׃ 37 נִסְקְלוּ בָאֲבָנִים גֹּרְרוּ בַמְּגֵרוֹת נִצְרְפוּ בְמַסָּה וְהוֹצִיאוּ נַפְשָׁם לְטִבְחַת חָרֶב נָעוּ בְּעוֹרֹת כְּבָשִׂים וְעִזִּים וְנָמֹגוּ בְחֹסֶר כֹּל בְּלַחַץ בְמָצוֹק׃ 38 וְהָאָרֶץ לֹא שׁוָֹה לָהֶם תָּעוּ בַמִּדְבָּר בְּהָרִים בִּמְעָרוֹת וּבִמְחִילוֹת עָפָר׃ 39 וְכָל-אֵלֶּה עֵדוּת לָהֶם עָל-אֱמוּנָתָם וְלֹא רָאוּ אֶת-הַהַבְטָחוֹת בְּקִיּוּמָן׃ 40 יַעַן הֵכִין אֱלֹהִים לָנוּ אֶת-הַטּוֹב מִקֶּדֶם לְבִלְתִּי יַגִּיעוּ הֵם לְכָל-תַּכְלִיתָם מִבַּלְעָדֵינוּ׃

יב    1 לָכֵן גַם-אֲנַחְנוּ אַחֲרֵי אֲשֶׁר הֲמוֹן עֵדִים כָּאֵלֶּה עֹטְרִים אֹתָנוּ כַּעֲנָנִים מִסָּבִיב נַשְׁלִיכָה מִמֶּנּוּ כָּל-מַשָּׂא וְחֵטְא אֲשֶׁר יִגְדְּרוּ בַעֲדֵנוּ תָמִיד וְעַל-גַּב תּוֹחֶלֶת נָרוּצָה בַמֵּרוֹץ הֶעָרוּךְ לְפָנֵינוּ׃ 2 וְעֵינֵינוּ אֶל-יֵשׁוּעַ צוּר אֱמוּנָתֵנוּ הַגֹּמֵר עָלֵינוּ אֲשֶׁר בַּעֲבוּר הַשִּׂמְחָה הַזְּרוּעָה לוֹ נָשָׂא עֵץ סֻבֳּלוֹ וְאֶת-הַחֶרְפָּה בָזָה וַיֵּשֶׁב לִימִין כִּסֵּא הָאֱלֹהִים׃ 3 הִתְבּוֹנְנוּ אֵלָיו אֲשֶׁר-נָשָׂא תִגְרָה כָזֹאת מִיַּד הַחַטָּאִים בְּנַפְשׁוֹ פֶּן-תִּתְרַפּוּ וְעָיְפָה נַפְשְׁכֶם׃ 4 עַד-כֹּה עוֹד לֹא קַמְתֶּם לְהִלָּחֵם בַּחֵטְא עַד-הַדָּם׃ 5 וַתִּשְׁכְּחוּ אֶת-הַתּוֹכֵחָה אֲשֶׁר נוֹכַחְתֶּם כְּבָנִים לֵאמֹר מוּסַר יְהוָֹה בְּנִי אַל-תִּמְאָס וְאַל-תָּקֹץ בְּתוֹכַחְתּוֹ׃ 6 כִּי אֶת אֲשֶׁר-יֶאֱהַב יְהוָֹה יוֹכִיחַ יַכְאִיב אֶת-בֵּן יִרְצֶה׃ 7 אִם-תִשְׂאוּ אֶת-מוּסָרוֹ הוּא לְאוֹת כִּי עֵינֵי אֱלֹהֵיכֶם עֲלֵיכֶם כְּבָנִים כִּי מִי הוּא הַבֵּן אֲשֶׁר אָבִיו לֹא יְיַסְּרֶנּוּ׃ 8 אֶפֶס אִם-תִּהְיוּ בְּאֵין-מוּסָר אֲשֶׁר הוּא מְנָת כֻּלָם הֲלֹא זָרִים אַתֶּם וְלֹא בָנִים׃ 9 הֵן יֶשׁ-לָנוּ אֲבוֹת בְּשָׂרֵנוּ אֲשֶׁר יִסְּרוּנוּ וַנִּירָא מִפְּנֵיהֶם אַף כִּי-עָלֵינוּ לְהִכָּנַע מִפְּנֵי אֲבִי הָרוּחוֹת לְמַעַן חָיֹה נִחְיֶה׃ 10 וְהֵמָּה יִסְּרוּנוּ לְיָמִים מְעָטִּים כַּטּוֹב בְּעֵינֵיהֶם אַךְ הוּא לְטוֹב לָנוּ לָתֶת-לָנוּ חֵלֶק בְּקָדְשׁוֹ׃ 11 וְכָל-מוּסָר לֹא יִמָּצֵא לְשָׂשׂוֹן בְּעִתּוֹ כִּי יוֹסִף עֶצֶב עִמּוֹ אַךְ אַחֲרֵי-כֵן יִתֵּן פְּרִי שָׁלוֹם לַאֲשֶׁר יִצָּרְפוּ בוֹ לִצְדָקָה׃ 12 עַל-כֵּן חַזְּקוּ יָדַיִם רָפוֹת וּבִרְכַּיִם כּשְׁלוֹת אַמֵּצוּ׃ 13 וְיַשְּׁרוּ מְסִלּוֹת לְרַגְלֵיכֶם לְבִלְתִּי תֵקַע כַּף יֶרֶךְ הַצֹּלֵעַ כִּי אִם-תֵּרָפֵא׃ 14 בַּקְּשׁוּ שָׁלוֹם עִם-כָּל-אָדָם וּקְדֻשָּׁה אֲשֶׁר מִבַּלְעָדֶיהָ לֹא-יִרְאֶה אִישׁ אֶת-הָאָדוֹן׃ 15 הִשָּׁמְרוּ לָכֶם פֶּן-יִגָּרַע אִישׁ מֵחֶסֶד אֱלֹהִים פֶּן-יֵשׁ בָּכֶם שֹׁרֶשׁ פֹּרֶה רֹאשׁ וְלַעֲנָה וְחֻלְּלוּ בוֹ רַבִּים׃ 16 פֶּן-יִהְיֶה בָכֶם אִישׁ זֹנֶה וְחָלָל כְּעֵשָׂו אֲשֶׁר מָכַר אֶת-בְּכֹרָתוֹ בְּעַד נְזִיד עֲדָשִׁים׃ 17 הֲלֹא יְדַעְתֶּם כִּי חָפֵץ אַחֲרֵי-כֵן לָרֶשֶׁת אֶת-הַבְּרָכָה וְשֹׁמֵעַ לֹא הָיָה לוֹ וְאַף כִּי-בִקֵּשׁ בְּדִמְעָה לֹא מָצָא מָקוֹם לִתְשׁוּבָתוֹ׃ 18 כִּי הִנֵּה לֹא בָאתֶם אֶל-הַר אֲשֶׁר תִּגַּע בּוֹ יָד וַאֲשֶׁר אֵשׁ תְּלַהֵט אֹתוֹ וְלֹא אֶל-עָנָן וַעֲרָפֶל וָרָעַשׁ׃ 19 וְלֹא לְקוֹל שׁוֹפָר וְקוֹל דְּבָרִים אֲשֶׁר שֹׁמְעָיו שָׁאֲלוּ לְבִלְתִּי יוֹסֵף דַּבֵּר עִמָּהֵם׃ 20 כִּי קָשְׁתָה עֲלֵיהֶם הַמִּצְוָה מִנְּשׂא לֵאמֹר וְאַף גַּם-בְּהֵמָה תִּגַּע בָּהָר סָקֹל תִּסָּקֵל אוֹ-יָרֹה תִיָּרֶה בַּחִצִּים׃ 21 וּמַה-נּוֹרָא הָיָה הַמַּחֲזֶה עַד שֶׁגַּם משֶׁה אָמַר פַּחַד קְרָאַנִי וּרְעָדָה׃ 22 כִּי אִם-בָּאתֶם אֶל-הַר צִיּוֹן אֶל-עִיר אֵל חָי אֶל-יְרוּשָׁלַיִם הָעֶלְיוֹנָה וְאֶל-רִבֲבוֹת צְבָא מַלְאָכִים׃ 23 וְאֶל-עֲדַת הַבְּכוֹרִים אֲשֶׁר הֵמָּה בַכְּתוּבִים בַּשָּׁמָיִם וְאֶל-אֱלֹהִים שֹׁפֵט הַכֹּל וְאֶל-רוּחוֹת הַצַּדִּיקִים אֲשֶׁר נַעֲשׂוּ שְׁלֵמִים׃ 24 וְאֶל-יֵשׁוּעַ מֵלִיץ לִבְרִית חֲדָשָׁה וְאֶל-דָּמוֹ הַנִּזְרָק אֲשֶׁר קוֹל קְרִיאָתוֹ טוֹב מִקּוֹל דְּמֵי הָבֶל׃ 25 הִשָּׁמְרוּ לָכֶם פֶּן-תָּסוּרוּ מִן-הַדֹּבֵר בָּכֶם כִּי אִם-לֹא נִמְלְטוּ הַסָּרִים מִן-מַזְהִירָם בָּאָרֶץ אֵיךְ נִמָּלֵט אַנֲחְנוּ אִם נָסוּר מִן-מַזְהִירֵנוּ מִשָּׁמַיִם׃ 26 אֲשֶׁר קֹלוֹ אָז הִרְעִישׁ אֶת-הָאָרֶץ וְעַתָּה הֻגַּד לֵאמֹר עוֹד אַחַת מְעַט הִיא וַאֲנִי מַרְעִישׁ לֹא לְבַד אֶת-הָאָרֶץ כִּי אִם-גַּם אֶת-הַשָּׁמָיִם׃ 27 וּמַה שֶּׁאָמַר עוֹד אַחַת מְעַט הוּא מַגִּיד חֲלִיפַת-כֹּל אֲשֶׁר יִמּוֹט מִן-הָרַעַשׁ כְּדָבָר נִבְרָא רַק לִזְמַנּוֹ וַאֲשֶׁר לֹא יִמּוֹט מִן-הָרַעַשׁ יַעֲמֹד לָעַד׃ 28 לָכֵן בִּהְיוֹת לָנוּ מַלְכוּת אֲשֶׁר לֹא תִמּוֹט נָבוֹאָה בְתוֹדָה וְנַעַבְדָה אֶת-הָאֱלֹהִים לְרָצוֹן לוֹ בְּאֵימָה ובְיִרְאָה׃ 29 כִּי אֱלֹהֵינוּ אֵשׁ אֹכְלָה הוּא׃

יג    1 שִׁמְרוּ אַהֲבַת אַחִים בֵּינֵיכֶם תָּמִיד׃ 2 וְאַל-תִּשְׁכְּחוּ מֵהַכְנִיס אֹרְחִים מֵאַהֲבָה כִּי בְאַהֲבָה זוּ יֵשׁ אֲשֶׁר בִּבְלִי-דַעַת הִכְנִיסוּ מַלְאָכִים אֶת-בָּתֵּיהֶם׃ 3 זִכְרוּ אֶת-הָאֲסִירִים כְּמוֹ אִם-אַתֶּם אֲסוּרִים עִמָּהֶם וְאֶת-הַנִּלְחָצִים כַּאֲשֶׁר גַּם-אַתֶּם עִמָּהֶם בְּבָשָׂר אֶחָד׃ 4 קֹדֶשׁ תִּהְיֶה הָאִישׁוּת לְכָל-אִישׁ מִכֶּם לֹא תְחַלְּלוּ אֶת-יְצוּעַ אִישׁ וְאֶת-זֹנִים וְנֹאֲפִים יִשְׁפֹּט אֱלֹהִים׃ 5 הַרְחִיקוּ דַרְכְּכֶם מֵאַהֲבַת כֶּסֶף וְשִׂמְחוּ בְדֵי חֶלְקְכֶם כִּי הוּא אָמַר לֹא אַרְפְּךָ וְלֹא אֶעֶזְבֶךָ׃ 6 עַל-כֵּן נִבְטַח וְנֹאמַר יְהוָֹה לִי בְּעֹזְרָי לֹא אִירָא מַה-יַּעֲשֶׂה לִי אָדָם׃ 7 זִכְרוּ אֶת-מְאַשְּׁרֵיכֶם אֲשֶׁר-הִגִּידוּ לָכֶם דְּבַר הָאֱלֹהִים בִּינוּ לְתַכְלִית דַּרְכָּם וּלְכוּ בֶאֱמוּנָתָם׃ 8 יֵשׁוּעַ הַמָּשִׁיחַ הִנּוֹ הוּא אֶתְמֹל וְהוּא הַיּוֹם וְהוּא לְעוֹלָם וָעֶד׃ 9 אַל-תִּמּוֹטוּ מִפְּנֵי תוֹרֹת שֹׁנוֹת וְזָרוֹת כִּי טוֹב לַלֵּב אֲשֶׁר חֶסֶד יִסְעָדֶנּוּ לֹא חֻקֵּי מַאֲכָלִים חֻקִּים לֹא-טוֹבִים לְבַעֲלֵיהֶם׃ 10 יֶשׁ-לָנוּ מִזְבֵּחַ אֲשֶׁר לֶאֱכֹל מֵעָלָיו אֵין מִשְׁפָּט לִמְשָׁרְתֵי הַמִּשְׁכָּן׃ 11 כִּי-פִגְרֵי הַזְּבָחִים אֲשֶׁר דָּמָם הוּבָא אֶל-הַקֹּדֶשׁ בְּיַד הַכֹּהֵן הַגָּדוֹל לְכַפֵּר עָוֹן נִשְׂרְפוּ מִחוּץ לַמַּחֲנֶה׃ 12 בַּעֲבוּר זֹאת גַּם-יֵשׁוּעַ לַאֲשֶׁר יְקַדֵּשׁ אֶת-הָעָם בְּדָמוֹ עֻנָּה מִחוּץ לַשָּׁעַר׃ 13 עַל-כֵּן נֵצְאָה-נָּא אֵלָיו אֶל-מִחוּץ לַמַּחֲנֶה וְנִשָּׂא אֶת-חֶרְפָּתוֹ׃ 14 פֹּה אֵין-לָנוּ עִיר עֹמֶדֶת לָעַד אַךְ הָעִיר הָעֲתִידָה אָנוּ מְבַקְשִׁים׃ 15 וְעַתָּה נַקְרִיב עַל-יָדוֹ זִבְחֵי תוֹדָה לֵאלֹהִים תָּמִיד הֲלֹא הֵם פְּרִי שְׂפָתֵינוּ הַנֹּתְנוֹת תּוֹדָה לִשְׁמוֹ׃ 16 אַךְ לִגְמָל-טוֹב וּלְפָזֵּר לָאֶבְיוֹנִים אַל-תִּשְׁכָּחוּ כִּי-זְבָחִים כָּאֵלֶּה הֵם לְרֵיחַ נִיחֹחַ לֵאלֹהִים׃ 17 שִׁמְעוּ אֶל-מְאַשְּׁרֵיכֶם וְהִכָּנְעוּ מִפְּנֵיהֶם כִּי-שֹׁקְדִים הֵם עַל-נַפְשֹׁתֵיכֶם כְּעֹמְדִים לָתֵת דִּין וְחֶשְׁבּוֹן בַּעֲבוּר יַעֲשׂוּ כָזֹאת בְּחֶדְוָה וְלֹא בַאֲנָחָה כִּי לוּלֵא כֵן לֹא-טוֹב לָכֶם הַדָּבָר הַזֶּה׃ 18 הִתְפַּלְלוּ עָלֵינוּ כִּי-יָדַעְנוּ מְאֹד כִּי נָכוֹן לִבֵּנוּ וּלְהִתְהַלֵּךְ בְּמֵישָׁרִים תָּמִיד כָּל-חֶפְצֵנוּ׃ 19 וּבְחֵפֶץ יֶתֶר אֲנִי שֹׁאֵל מֵעִמָּכֶם לַעֲשׂוֹת זֹאת לְבַעֲבוּר יֻתַּן לִי לָשׁוּב אֲלֵיכֶם עַד-מְהֵרָה׃ 20 וֵאלֹהֵי הַשָּׁלוֹם אֲשֶׁר בְּדַם בְּרִית עוֹלָם הֵקִים מִן-הַמֵּתִים אֶת-רֹעֵה הַצֹּאן הַגָּדוֹל אֶת-יֵשׁוּעַ אֲדֹנֵינוּ׃ 21 הוּא יְכוֹנֵן אֶתְכֶם בְּכָל-מַעֲשֶׂה טּוֹב לְמַלֵּא אֶת-חֶפְצוֹ וְיִפְעַל עִמָּכֶם כַּטּוֹב בְּעֵינָיו בְּיַד-יֵשׁוּעַ הַמָּשִׁיחַ אֲשֶׁר-לוֹ הַכָּבוֹד לְעוֹלָם וָעֶד אָמֵן׃ 22 וַאֲנִי שֹׁאֵל מֵעִמָּכֶם אַחַי שְׂאוּ-נָא דִּבְרֵי מוּסָרִי כִּי-מְעַט מִזְעָר כָּתַבְתִּי אֲלֵיכֶם׃ 23 וּדְעוּ כִּי טִימוֹתִיּוֹס אָחִינוּ יָצָא לַחָפְשִׁי וְאִם-יָבֹא בְקֶרֶב הַיָּמִים אֶרְאֶה אִתּוֹ אֶת-פְּנֵיכֶם׃ 24 שַׁאֲלוּ לִשְׁלוֹם כָּל-מְאָשְּׁרֵיכֶם וְכָל-הַקְּדוֹשִׁים וְאֵלֶּה אֲשֶׁר מֵאִיטַלְיָא פֹּקְדִים לְשָׁלוֹם לָכֶם׃ 25 הַחֶסֶד עִם-כֻּלְּכֶם אָמֵן׃


Index              Poster